Удзельнікі майстар-класаў змаглі не толькі даведацца пра рацэпты традыцыйных страў, але і паспрабаваць свае сілы ў іх прыгатаванні!

Майстар-класы суправаджаліся апавяданнямі пра культурнае значэнне беларускай кухні, яе ролю ў аб’яднанні сям’і і роду. Удзельнікі не толькі назіралі за працэсам, але і самі паспрабавалі прыгатаваць стравы, што стварыла атмасферу жывых зносін і творчасці.

У Бенінскім СКБ гаспадыні падзяліліся сакрэтамі прыгатавання мачанкі з блінамі, падкрэсліўшы важнасць выкарыстання мясцовых прадуктаў і захавання аўтэнтычных рацэптаў. Мачанка — адна са страў, якая з’яўляецца традыцыйнай, самабытнай, уласціва толькі нацыянальнай беларускай кухні. Уяўляе сабой кавалачкі мяса (грудзінкі, хатняй каўбаскі, рабрынак) у загушчанай мукой падліве . Падаецца з блінамі, якія ў гэтую падліўку мачаюцца, адсюль і назва «Мачанка». І  рацэптамі гэтай стравай падзялілся жыхаркі вёскі Бенін.

У Налібацкім СКБ увага была нададзена мясным стравам на Калядкі: калдуны і хатняя каўбаса. Падчас майстар-класа ўдзельнікі даведаліся пра гатаванне гэтых традыцыйных беларускіх калядных страў, а таксама атрымалі магчымасць самастойна прыгатаваць іх пад кіраўніцтвам мясцовых гаспадынь! Акрамя таго, гасцям прапанавалі зрабіць хатнюю каўбасу — яе ўласнаручна напаўнялі свежай мясной масай, выкарыстоўваючы натуральныя інгрэдыенты і спецыі.

Бульбяныя калдуны па-беларускі
Інгрэдыенты:
Бульба
Фарш мясны
Цыбуля рэпчатая
Соль па гусце
Перац чорны молаты
Масла для запякання

Спачатку рыхтуем фарш (ён павінен прахарчавацца заправамі), дадаем перац, лук соль і змешваем. На дробнай цёрцы ператром бульбу і крыху цыбулі, каб бульба не счарнела. Перацёртую бульбу перакладаем у марлю, складзеную ў два пласта, добра адціскаем. Сок пакідаем у місцы адстойвацца. Як толькі з`явіўся сок, зліваем яго, а пакінуты ў талерцы крахмал дадаем у бульбу, солім, перчым. Фарміруем калдуны рукамі, надаючы ім авальную форму: які робіцца ў аладку з бульбы, кладзем начынне з фаршу, заварочваем фарш у бульбяную аладку. Сфармаваныя калдуны абсмажваем у алеі са ўсіх бакоў. Перакладаем калдуны ў форму і  адпраўляем у разагрэтую да 200 º духоўку на 50 хвілін.

Хатняя каўбаса вясковая
Для каўбасы бралі свежае свіное мяса, выразанае з міжрэбернай часткі свініны. З такога мяса каўбаса будзе далікатная і сакавітая. Мяса рэзалі нажом на дробныя кубікі. Потым дадавалі заправы: кроп, цмін, перац. Перад гэтым прыправы падсушвалі на сухой патэльні і разміналі іх у ступцы. Яны атрымліваліся вельмі духмянымі. Часнык секлі нажом дробна і дадавалі ў фарш. Соль дадавалі да смаку. Фарш змешвалі і давалі настаяцца каля гадзіны. А потым закладвалі ў кішку праз рыльца графіна  рукамі. Цяпер праз мясасечку.

Завяршэннем мерапрыемстваў стала дэгустацыя, падчас якой кожны змог ацаніць багацце густаў і адчуць сувязь з нацыянальнымі традыцыямі.